حالف انا -شعر بالعامية المصرية

عاشق جنونك

عاشق جنونك يا قمر عاشق جنونك

وباحب لونك يا قمر وباحب لونك

وباخاف ظنونك والسهر عارف عيونك

هابدا عشانك يا قمر مشوار طويل

ولا اخاف عذاب وقت الضنا ولا عمري اميل

دا جمال شعورك يا قمر ملهوش مثيل

وانا حبي ليك كان العمل كان الدليل

في الليل معاك يحلي اللقا يحلي الكلام

وهاحب بهجة طلعتك وانسي الخصام

وانعس ف ساعة صحبتك ويا الهيام

واحب لونك يا قمر واحب لونك

ولا عمي اخونك يا قمر ولا عمري اخونك

************

عينك تقول

عينك تقول مغرم يا طير دايب انا ف حبك حبك أسير

ولا كان لحبك يوم ضمير ويحن ليك ولا يخدعه

بريء أنا منك بريء قلب الخداع ظالم جريء

دايب ف بركانك غريق ولا كان ضميرك يخدعك

غيري عيونه تصدقك من شهد حبه يدوقك

من نظرة واحدة بيعشقك ولا من حنانه يمنعك

غيري صحيح مليان غرام وعيونه فيها الابتسام

وف قلبه هتشوف الوئام ولاعمره مرة يضيعك

كان غيري ممكن يسمعك ويحس بيك ولا يخدعك

************
قصة غرام

مليت أنا منك خلاص ونسيت معاك طعم الخلاص

حبك صحيح لا حكايات ولا كان لأحلامك أساس

حيرت قلبي بالكلام وعملت لي قصة غرام

وأخذتني وسط الغيام وغرقت بين نظرة وكاس

عديت معاك شطك بعيد وفضلت فيه حيران وحيد

وبقيت انا ف حبك شهيد وهجرتني وسط الزحام

منك أنا شفت الخداع وجريت ورا همس الضياع

وهجرتني بكلمة وداع ودبحتني بكلمة هيام

خليت عيوني كالنسيم ورمتني ليه وسط النعيم

وفتحت لي القلب الرحيم ونسيت مع النور الظلام

ومليت دروب الدنيا نور وياك هويت موج البحور


وعبرت فوق كل الشعور وقلبت ليه تاني الشراع

*********
إلا أنا

إلا أنا ترميه وتنسي مودته إلا أنا

إلا أنا تهجر حناه وجنته إلا أنا

إلا أنا تقدر تبيع إلا أنا لهواك يطيع


إلا أنا ترميه بعيد ويعود لأوهامك سعيد

غيري أنا يعبد هواك يتمني لو لحظة ف لقاك

ينسي النعيم ساعة قساك بجناحه هيضلل عليك

سيب جنة الإخلاص خلاص حبك مالوش عندي أساس

ولا عمر كان عندك حماس واهو كله منك أو إليك

ولا عمر هتفيد الدموع ولا هافتكر غير الخنوع

ومفيش خلاص بينا رجوع وامسح دموعك من عنيك

إلا أنا يعبد جنون يجري عشان همس الظنون



إلا أنا لهواه تخون وترجعه لمسة اديك
إلا أنا

***********
قلوب قاسية

فيه ناس بتهد معروفها وتطلب للبشر خوفها

وساعة الحيرة بتشوفها في راحة بال وف استقرار

سعادة الناس لهم تئلم تشوف القسوة تتبسم

ومن طيب الكلام تحرم وتصنع لوعة الأفكار

علي جبينهم شعار البين وف عنيهم عذاب وأنين

لا تلقي حب ولا حنين ولا بسمة ولا أنوار

تشوف الرحمة تتكدر تشوف الحب تتعكر

وساعة الحيرة بتنور وتنشر للخطر أشعار

وناس ويا الجراح تفرح وساعة الحسرة راح تسرح

وتبني للهوان مطرح ولا تزعل ولا تحتار

وناس تقطع قدم خيرها عشان ميعيش فيه غيرها

ولا ترسل في يوم نورها وتبني للخراب أدوار

وناس غرقانة تحت المال وبينها والسماحة جبال

بتدفع للخراب أهوال وبينها والعمار أسوار

**************

يا دنيا ليه البكا

يا دنيا ليه البكا والصبر ترحالي

أبكي عا اللي جرا واللا اللي يجرا لي

يا رب ألطف بنا واهدينا يوم للهنا

ساعة رضاك برنا كنز الرضا غالي

الدنيا هجر وذل واليأس طاوي الكل

لكن نداك بديل علي حسن أعمالي

في رحمتك إحسان جنة رضاك غفران

ألقي الأمل بيبان ارتاح أنا وبالي

كل اللي كان بيا قسوة معدية

علي قلبي وعنيا وابكي علي حالي

وعشان باحب الخير أنا قلبي لبه بيطير

ومعاه هاعيش وأسير وهاحط أحمالي

يا رب فيضك أمل يكفيني وقت الزلل

كل اللي كان أو حصل جهلي وإهمالي

هاملي عنيا بنور وأتوه ف أرض الحور
ذنبي يكون مغفور وأنام وانا خالي

*********
حالف انا

حالف أنا لأكون بركان يضرب قلب خسيس وجبان

ولا عمري اركع للطغيان وأكون نار علي أي هوان

وانا عمري ما كنت ف يوم خايف

حالف أكون بالحق أمير وامشي واساند فعل الخير

وامسك شمعة لكل ضمير وابقي لأهل الحب نصير

وعشان كد انا هافضل شايف

هافضل اشيل الخير ونداه وافضل احب بقلبي لقاه


واقعد اعد سنيني معاه وانا دايما بارتاح في هداه
قلت لأهل الزور أنا آسف

حالف أنا لأعيش في النور وابني لأهل الحب قصور

وازرع أرض الحب زهور وامسك شمعة لكل شعور
وانا قلبي للعالم كاشف

آسف أنا علي إني أخون أهلي لعهد الغدر أصون

هالقي ف قلبي عذاب الهون والقي فؤادي ملان بجنون

وارجع تاني أقول مش عارف حالف حالف

*****