الطريقة : تعجن العجيبنه والموية تصبينها بشويش ولين جيتي تعجنبين صفقي العجبينه وخبطي فيها وارفعي يدك فوق والعجبينه فيها بعدين اخبطي بها في الصحن وكركري العمليه واجد واذا كان فيه احد نايم في البيت ترى لازم يقوم من صوت التخبيط اذا ماقام اعرفي ان عجينتس تسلم عليتس بعد التخبيط خلي خلي العجينه في مكان دافئ وغطيها بكيس العثيم واتركيها ساعه ثم روحي زيني الكشنه . حطي في الخلاط حبتين طماط وحبتين بصل والماجي واخلطيهم وعلى النار حطي بصله مقطعه واحمسيها بزيت زيتون ثم صبي عليها اللي في الخلاط وحطي البهارات والاريغاينو والملح واتركيها على نار هادية الين تتكاثف واذا خلصت حطي ملعقتين كاتشب وصلصه واخلطيهم ( ترى انا حطيت شطه بعد ذيك حقت سومطره ) بعد ساعه شوفي عجينتس تلقينها انتفشت وصارت زينه الحين افرديها ثم حطيها بالصينيه ( ملاحظة كبر جبهة اختي : ترى العجينه كثيرة قالت لي امي حطيها بصينيتين بتصير منتفشه بس انا قلت لا بيتزا هت موب احسن مني وانا في نفسي اقول والله مالي خلق صينيتين ) الحين حطي في الاطراف جبن سايل واصفطي عليها وبعدين ادهنيها بالصلصة ورشي زعتر عليها وبعدها ذرذري باقي الاشياء واخر شي حطي جبن الموزاريلا والكرافت وتوصي فيهم تكونين ترى مشغله الفرن قبل عشان يصير حار تقريبا ً خليها ربع ساعه بعدين شغليه من فوق وخليه شوي .
الطريقة : قطعي الدجاج وتبليه الدجاج بالبرابيس حقتها وقطعي الخضروات بشكل طولي ذوبي زبدة وحطي البصل والدجاج والبهارات وخليهم تقريبا 10 دقايق بعدها حطي باقي الخضروات والملح واتركيها على نار هادية الين تذبل الحين جيبي صينيه وكبي فيها عفشك وصبي عليهم كريمة الخفق ورشيها بالجبن وحطيها في الفرن من تحت تقريبا ربع ساعه وبعدين من فوق وبس مره سهله ترى بسرعه تخلص
كل ماحد شافني قال قومي قطعي لنا فواكه حتى من كثر ماأقطع حسيت ان مكتوب على جبهتي سلطه فواكه واغلب الاحيان اقطعها بسرعه بسرعه واكثر الموز عشانه سريع الزرط سهل التقطيع كببير الحجم وياخذ مساحة في الصحن وتصير سلطه بالموز الذاوي المسود حتى شكلها يسد النفس عاد هالمره رحمتهم قلت خل ادلعهم اسوي شي ياكلونه وهم يقولون الله ياحظنا ان ذي اختنا
الحين جيبي شوي من المانجا واخلطي معها قشطه وحطي في كل كاس تقريباً ملعقه ونص وصبي عليهم شوي فيمتو وبعدها صبي مانجو , الكيوي قشريه واهرسيه بشوكه بعدين اخلطيها مع سكر ( السكر على حسب الكيوي اللي بتهرسينه ) واخلطي معهم ثلج مجروش وصبيهم على الكاسات قطعي المشمش وحطيه على عصير الفراوله وصبيهم فوق الاشياء آخر شي اذا ودك يعني ذرذري على كاس شوي رمان عشان تصيرين اخت باره
الإثنين أغسطس 22, 2011 4:39 pm
